باسل النجار = الرياض في الخميس 20 فبراير 2025 06:16 مساءً - بقلم بهاء حجازي

أحمد زكي من شدة تقمصه لشخصية البواب في فيلم البيه البواب، وهو بيصور.. كان قاعد قدام العمارة في الزمالك.. لحد ما يجهزوا الشوت اللي هيصوروه.. لابس لبس البواب بالبُلغة.. بالطاقية على راسه… بالشنب العريض وبيشرب سيجارة… وكان فيه عربية المفروض هتنزل حاجة ساقعة..

فالمخرج بياخد الشوت من الناحية التانية من الشارع.. فجه واحد من سكان العمارة الحقيقيين.. قال لاحمد زكي: “قاعد ومجعوص يا اخويا.. ايه المصيبة دي كل شوية هيجيلولنا بواب شكل.. ومعرفش خالص إنه أحمد زكي..

بعدها جه بتاع الكهربا وقاله فين فلوس الاسانسير يا سيدي.. فأحمد استغرب انه معرفوش فبتاع الكهربا قاله متتمنعلش (متبقاش مل***عون يعني).. انا عارف حركات البوابين كويس..

الموقف التالت إنه قرر ينزل يشتري اكل لفريق التصوير بهدوم البواب.. علشان يشوف هل الناس هتعرفه ولا لا.. وهل بعد الماكيب والتغيير الشكلي اللي عمله لسه فيه من أحمد زكي ولا، فراح اشتري ورجع من غير ما حد يعرفه.. ودي قمة النجاح لاي ممثل..

أحمد زكي في برنامج لسه فاكر مع نهال كمال، اتكلم عن الفيلم وعن الشخصية وانه بسببها اتصاحب على كل البوابين، وإنه كل بيت يخشه يلاقي البواب عارفه ويقوله انت عملتلنا صيت يا عبسميع… ويقلدوه وهو بيغني أنا بيه أنا بيه.

في نفس الحلقة بتاعت لسه فاكر، سألت نهال كمال بوابين حقيقيين.. عن رأيهم في دور أحمد زكي، هل هو نجح يعمل البواب ولا لا.. فواحد منهم قالها: “التمثيل مظبوط مية مية.. وانا بقدره تقدير جامد.. ولو عندي مالية هصرفله مالية”.. يعني لو معايا فلوس كنت اديتله مكافأة..

فساعتها أحمد زكي ضحك جدا. كإنه خد 200 جايزة..