باسل النجار = الرياض في الأحد 4 مايو 2025 08:35 مساءً - لما سأل الفنان نور الشريف عن احسن ممثلة فى السينما المصرية قال : اذا كان زكى رستم احسن ممثل في السينما المصرية فامينة رزق هى احسن ممثلة فى السينما المصرية
أمينة رزق أشهر ام فى السينما المصرية بالرغم من عدم الزواج طوال حياتها
ولدت بمدينة طنطا، لأب وأم ميسورى الحال وتوفى والدها وهى بالثامنة من عمرها.
انتقلت مع والدتها إلى القاهرة عند خالتها التي كانت تعمل ممثلة وكانت السبب فى شغف أمينة رزق بالفن
لقبت بـ عذراء السينما المصرية” لعزوفها عن الزواج حيث قالت انها مرت بتجربة حب ولن تكررها
أمينة رزق مواليد سنة 1910 في طنطا..
عشقت المسرح والفن من بعد وفاة والدها وهي عندها 8 سنين.. كانت بتروح وقتها مسرح على الكسار مع خالتها اللي كانت بتشتغل في الفرقة، ولما “أمينة” وصلت لسن 12 انضمت “أمينة” للفرقة ككومبارس سنة 1922 ثم لـ ممثلة بتقدم عروض كتيرة.. في البداية أهلها كانوا رافضين شغلها في الفن بس بعد إلحاح كبير منها وافقوا وبسبب إنبساطها بموافقتهم بتقول فى حوارها مع مفيد فوزي إنها نزلت توزع فلوس وفول وعيش في الحسين على الناس في الشارع.. وبدأ مشوارها اللي استمر لمدة 80 سنة فن!..
لما وصلت لسن 18 سنة دخلت مجال السينما وقدمت دور في فيلم “سعاد الغجرية” مع المخرج الإيطالي “جاك شوتز” ودورها نجح لدرجة إن بدأت العروض تنهال عليها من المخرجين.. بس هي ماكررتش التجربة غير بعد 4 سنين في فيلم “أولاد الذوات” مع أنور وجدي و”يوسف وهبي..
يوسف وهبي تبناها فنياً وعملت معاه أغلب أعماله وكان بيثق في قدراتها التمثيلية بدون حدود.. ويمكن من الشائعات اللي انتشرت عن أمينة واللي هي نفتها كذا مرة بعد كده إن كان فيه قصة حب من طرف واحد تجاه “يوسف وهبي بس ده كلام مش صح..
أمينة” كانت بتحب الغنا كمان وبيقولوا إن صوتها كان حلو ومميز.. فعلاً غنت مرة واحدة بس في حياتها ضمن فيلم “رجل بين امرأتين” سنة 1940 وماكررتش التجربة..
رصيد أمينة كان أكتر من 150 فيلم، وحوالي 90 مسلسل، وطبعاً غير المسرحيات الكتير اللي عملتها على مدار تاريخها..
عن عدم جوازها بتقول “أمينة”إن حبها وعشقها للفن أغناها عن كل حاجة وكان زى الأكل والشرب بالنسبة لروحها وإنها ماتقدرش تسيب الفن عشان تتجوز!..
تخيل أن أمينة رزق قفلت السكة في وش مبارك وقالت له: عـيب أنا زي أمك
الحكاية بيقولها الدكتور مصطفى الفقي في مذكراته أنه في يوم كانت الفنانة أمينة رزق في بيتها وفجأة رن التليفون فراحت ترد فلقيت حد بيقولها أزيك يا أستاذة أمينة أنا مبـ..ــارك ، فراحت الفنانة أمينة رزق افتكرت أن حد بيهزر وقالت له: عيب عليك أنا سـت كبيرة قبل ما أكون فنانة وقفلت السكة.
وقتها مبارك استغرب وبلغ الموظفين أنهم يكلموها ويفهموها وفعلا كلموها 3 مرات وهي مصممة تقفل السكة في وشهم وفي رابع مرة كلموها وقالوا لها: ممكن حضرتك لو مش متأكدة تكلمي الرقم ده ضروري وفعلا كلمت أمين رزق الرقم واتحول الخط لمبارك اللي ضحك وقالها: يا أستاذة أمينة حد يقفل السكة في وشي ده أنا عايز أعينك عضو في الشورى
مين ينسا ادوارها الجميلة فى مسلسل البشاير مع محمود عبد العزيز والكيت كات وفيلم المولد ومشهدها العظيم فى فيلم ناصر 56 ومن عجائب الفنانة امينة رزق
انها في سنة 1960 كانت ام اللاعب صالح سليم اللى كان شاب عمره تلاتين سنة في فيلم الشموع السوداء
وفي سنة 1989 كانت ام لطفل عمره سنتين ضاع منها في المولد واقنعتنا فى الدورين
اخر ادوارها فى السينما فيلم الكلام فى الممنوع عام 2000
وفى التليفزيون مسلسل أدهم وزينات وثلاث بنات عام 2003
اتوفت سنة 2003 بعد ما سابت محبة وتاريخ في قلب وذهن كل الجمهور.. ربنا يرحم الفنانة القديرة والعظيمة أمينة رزق رمز الأمومة والطيبة في السينما المصرية والعربية.
