باسل النجار = الرياض في الأحد 9 مارس 2025 01:07 مساءً - ڨمسلسل أشغال شقة
بوست مش هيعجب ناس كتير
ولكن ده رأى يعبر عن صاحبه فقط وياريت يوصل للقائمين على المسلسل لانى انا من اكتر الناس اللى عجبنى الجزء الأول
فى البدايه انا اتفرجت على الجزء الأول واحترمت جدا المسلسل ده لانه يعتمد على كوميديا الموقف والسنه دى كان أول مسلسل اتابعه هو أشغال شقة ولكنى صدمت.. المسلسل بكل حياديه مقزز
الحلقات بتعتمد على الايحاءات الجنسيه بدون اعتبار لحرمة الشهر الفضيل..
شخصية سناء المرأة المتزوجة والحامل التى تبحث عن ابو الطفل.. ويتضح انها على علاقة بأكثر من خمسين رجل.. منهم طفل وابوه وحوار يعتمد على الايحاءات الجنسيه الفجة.. فلان فضل سبع ساعات
فلان قعد خمس دقايق
لا ده ملحقش يعمل حاجه
انا يدوب بس عرفت ابوس
وكلام فى منتهى الوقاحة لا يراعون الشهر المبارك ولا الأطفال التى تشاهد العمل..
خلصنا من القرف ده
جلنا مشهد تحليل المخدرات
ومشاهد فى منتهى الفجاجة فى الحمامات لاخذ عينة البول وحوار مقزز بين أبطال العمل.. جايبن الممثلين عادى يدخلوا الحمام ويفتح السوسته وشويه هيطرطر فى وشنا
الصراحة مشهد فى منتهى السخافة..
حتى مشاهد مدينه (الممثله السودانيه اللى طالعين تتنمروا عليها ) .. بتسال مصطفى غريب احط السرفيس فين؟؟ يقولها بكل وقاحه لولا عارف انك مش مصريه كنت قولتلك فين ..
حوار فى منتهى الس.. فاله..
حلقة الخادمه بتاعة المخدرات.. ناهد السباعى وهى بتتعاطى المخدرات في الحمام.. مشهد فى منتهى القرف..
ايه اللى بتقدموه للناس ده؟؟
ادخل بقا على عملية البواسير للفنان مصطفى غريب وحدث ولا حرج..
الفاظ خادشة للحياء
ومشهد العيادة..
دى محتاجه تبريد
وفى جهاز هيبرد
هيدخل فين يا دكتور؟؟
وكلام فى منتهى قلة الأدب..
احنا في أول الحلقات وكمية ايحاءات واشمئزاز غير طبيعيه..
الناس اللى طالعه بالمسلسل السماء
هو مجتمعنا بقا عادى الحوار فيه كده؟؟
لو اب قاعد مع زوجته وبنته هيقدر يتفرج على حلقة الزوجة اللعوب وهى بتدور على ابو الطفل؟؟ لو عادى يبقا عليه العوض فى هذا المجتمع..
الغريب ان اللى كاتب الحلقات اخوات شرين دياب وخالد دياب.. انا استغرابي على المؤلفه شرين دياب ليه مطلعة المرآة بالصورة الفجة دى؟؟
هو احنا مينفعش نضحك الناس بدون اسفاف؟؟
المسلسل ماخوذ من فيلم زوجتى العزيزة شكرا للفنان صلاح ذو الفقار والفنانه نيللى
بس لو نقارن بين المسلسل والفيلم هناك فرق شاسع..
الفنان هشام ماجد فى اكتر من لقاء اعتذر عن تلك المشاهد وده مش كفاية
المفروض كل القائمين على المسلسل يعتذروا على هذا العمل الخادش للحياء
وانا موافق على الدعوة اللى رفعها احد المحامين للمطالبة بوقف هذا المسلسل المنحل
