باسل النجار = الرياض في الخميس 30 يناير 2025 06:12 مساءً - اللي في الصورة دي مش شخص واحد دول شخصين.. ليلى شعير وصوفيا لورين… ليلى شعير كانت عارضة ازياء وملكة جمال مصر… كانت شديدة الجمال بس كانت ممثلة على قدها قوي.. اشهر ادوارها دورين.. دور في فيلم العريس يصل غدا مع سعاد حسني وأحمد رمزي وفؤاد المهندس.. ودور في عائلة زيزي مع كاست مختلف تماما.. برضه سعاد حسني واحمد رمزي وفؤاد المهندس..

اتجوزت من الفنان عمرو الترجمان .. عمرو كان ممثل ضعيف بس كان وسيم فدخل الفن من باب الوسامة..
وبيحكي أحمد رمزي عنه: “كنا بنتقابل في نادي الجزيرة، وفي مرة من المرات وقف عمرو الترجمان وقال نكتة عن عبدالناصر، وضحكنا كلنا عليها والموضوع عدى. بس بعدها علطول فوجئت إن والد عمرو بيقول إنه مارجعش البيت بقاله 3 أيام، ومش عارفين عنه حاجة.

ولما رجع لقيناه مابيتكلمش ومبلم، والنكتة دي كانت سبب في إن يتم اعتقاله، وبعدها سافر ومرجعش”.. وهي كمان سافرت برا فترة وبعدين رجعت بس كانت كبرت خالص..

ليلى اصلا ابوها نحات مصري وكان مشهور قوي اسمه احمد شعير، وعمل تمثال للملك فاروق واتحط في ميدان التحرير، وامها كانت مغنية اوبرا فرنسية، وابوها قابل امها في فرنسا، وحبها واتجوزها، عمها امين شعير كان كابتن النادي الاهلي ولاعب واداري معروف الناس القدام يعرفوه..

ليلى شعير لما كبرت اتطلقت من جوزها ورجعت مصر تاني.

وشاركت مع أحمد زكي في فيلم الهروب.. المفروض بتبقى هي السبب في انحراف خطيبة احمد زكي وبنت عمه، وهو بقى بيقرر ينتفم، وفيه مشهد بيضربها بالقلم كل ما يضرب القلم، عاطف الطيب يقوله مش مقتنع عيده تاني… دي دمرتلك حياتك.. يضرب.. يقوله لا يا احمد. القلم دا لازم يشفي غليلك.. لحد ما عادوه 20 مرة.. فـ جابت دم واغمى عليها.. وجات الاسعاف شالتها..