باسل النجار = الرياض في الجمعة 10 يناير 2025 06:56 مساءً - لو شفت مسرحية ريا وسكينة، اول ما بيظهر مدبولي على المسرح، بيتقابل بموجة تصفيق كبيرة، والمسرح كله بيقول “بابا عبده.. بابا عبده”، في صوت واحد..
دا لان في سنة 1979 .. اتعرض مسلسل بيوقف مصر على رجل .. مسلسل ابنائي الاعزاء شكرا .. اللي المصريين بقوا يعرفوه باسم بابا عبده بسبب اسم شخصية مدبولي في المسلسل .. المسلسل بيتكلم عن جحود الابناء مع ابوهم .. والمسلسل حرفيا كان عياط بس.. لو عايز تتنكد ومعندكش اسباب كافية يعني..شوف المسلسل.. هتشيل هم من النوع الفاخر…
المسلسل بيحكي عن بابا عبده.. الراجل الستيني اللي مراته ماتت وربى ولاده الاربعة احسن تربية (كما هو متوقع يعني).. والحقيقة ان اي اب شايف انه ربى ولاده احسن تربية.. مفيش اب بيشوف انه مرباش كويس أو انه قصر مثلا..لكن السؤال ايه هو المقياس اللي قيست عليه التربية دي.. المهم يعني هو خلف 3 ولاد وبنت.. الولد الكبير صحفي (يحيى الفخراني).. ومراته زيزي مصطفى.. انا عايز اقولك ان امي دعت على زيزي مصطفى كمية دعاوى في المسلسل دا.. إن شاء الله متبقاش من نصيبها… الولد الوسطاني (ماجد – فاروق الفيشاوي – دكتور).. والولد الاخير عاطف – صلاح السعدني.. والبنت عفاف اثار الحكيم..
وعمك بابا عبده.. بيطلع عين اللي خلفوه حرفيا.. مع انك لو حكمت ع المسلسل بمقاييس النهاردة.. فـ بابا عبده غلطان في حاجات كتير عادي… بس مش موضوعنا..
المهم يعني السادات كان في اجتماع للحكومة وقال لرئيس الحكومة بسرعة والنبي علشان عايز اشوف بابا عبده .. ولما راح وفد من النقابات الفنية يقابل السادات قالهم سلمولي والنبي على بابا عبده .. ولما عرف مدبولي بالقصة بعتله جواب شكره .. بل ان السادات اتصل برئيس التلفزيون وقاله ايه اللي انتوا بتعملوه في بابا عبده دا .. الراجل طلع عينه يا اخي .. ولما السادات قابل مدبولي بعد المسلسل قاله يا أستاذ مدبولي أنا كنت بتابع المسلسل وألغي أي ارتباطات علشان اشوفه في ميعاده، وكنت بسجله علشان اشوفه مرة تانية قبل النوم…
وبعدها السادات كرمه واداله شهادة تقدير خاصة في أكاديمية الفنون .. وبعدها السادات مات بفترة قصيرة.. بس قبلها السادات كان قابل رشدي اباظة في تكريم.. وقاله ما تعمله حاجة زي بابا عبده.. وفعلا بدأ رشدي اباظة يشتغل بس المسلسل كان نحس عليه وعلى كل اللي اشتغلوا فيه..
سافر مدبولي بعد المسلسل في رحلة علاج صغيرة لليونان .. وكان ماشي مع مراته في اثينا .. لقى واحدة ست بتحضنه وتبوس فيه .. وتقوله سلامتك يا بابا عبده .. سلامتك يا بابا عبده .. متزعلش منهم يا حبيبي .. متزعلش منهم .. امسحها فيا انا..
#بهاء_حجازي
