باسل النجار = الرياض في الأحد 22 ديسمبر 2024 09:42 صباحاً - ناس كتير متعرفش ان الفنانة الكبيرة فردوس عبد الحميد هي ام المخرج الكوميدي الجميل خالد الحلفاوي، من زيجتها الاولى من الفنان نبيل الحلفاوي، قبل ما تنفصل عنه وتتجوز من المخرج الكبير محمد فاضل (بالمناسبة محمد فاضل قبل فردوس كان متجوز من المخرجة إنعام محمد علي)..
علشان كدا مدام فردوس ظهرت من كام سنة في مسلسل الوصية في الحلقات بتاعت كابتن زبدة .. لما كانت قاعدة في المدرجات ولابسة لبس شخصيتها في مسلسل الاسطورة، وباصلها وقالها راضية عني… في محاكاة لمشهدها الشهير في الاسطورة .. والمشهد اتوظف حلو قوي في المسلسل… لان المسلسل من إخراج خالد الحلفاوي..
كمان ظهرت كضيفة شرف في حلقة من مسلسل “مكتوب عليا”، من إخراج خالد الحلفاوي، وعملت دور الكا*تعة اللي بتخطف العيال .. في محاكاة برضه لدور نعيمة الصغير في الفيلم الشهيرة “العفار*يت”. بطولة عمرو دياب ومديحة كامل..
وهتلاقي آخر عمل لنبيل الحلفاوي في السينما كان ظهوره في فيلم “تسليم أهالي”، لدنيا سمير غانم وهشام ماجد من إخراج ابنه خالد الحلفاوي..
على المستوى الشخصي بحب انا الفنانة فردوس عبد الحميد .. لانها شبه خالتي منى جدا .. بجد والله .. هي تشبه خالة من خالاتي .. فبحس بنوع من الالفة والقرب بيني وبينها.. مع اني مقابلتهاش غير مرة واحدة في دار الاوبرا كان افتتاح مهرجان وانا كنت بغطي المهرجان وهي كانت حاضرة .. هي طبعا متعرفنيش .. لكن انا كنت ببصلها على انها خالتي وكنت ببصلها بود شديد .. اللي هو لو ركزت مع بصاتي .. لاما هتحطني في خانة مسكر في مسلسل ابن حلال .. لاما هتحطني في خانة حمدي الوزير في معظم اعماله.
نبيل الحلفاوي، ليه ابن تاني مخرج برضه اسمه وليد الحلفاوي، وعمل اعمال زي في بيتنا روبوت الجزء الاول .. وسوبر ميرو وفيلم علي بابا والفيلم المهم وش في وش.. ففي يوم عيد ميلاد الفنان نبيل الحلفاوي رحمة الله عليه، من كام سنة كتبت انا ان وليد وخالد ولاد فردوس عبد الحميد .. ودا مش صحيح لان وليد ابن السيدة الفاضلة نادية كمال زوجة الفنان نبيل الحلفاوي الثانية، وساعتها حد سأل الاستاذ نبيل، صحيح انت مخلف ولدين من مدام فردوس زي ما مصراوي بتقول، فالراجل رد وقال لا خالد بس .. وليد من مراتي التانية… طبعا كانت لقطة مش حلوة.. واتخصملي 300 جنيه، وهذا رقم لو تعلمون عظيم وقتها.. لاني تقريبا كنت باخد 1500 جنيه..
والحقيقة، محبة خالص لكل الوارد اسمائهم في البوست، وخصوصا الاستاذ نبيل الحلفاوي رحمة الله عليه، وأسالكم الدعاء ليه بالرحمة..
منقول
