باسل النجار = الرياض في الجمعة 7 فبراير 2025 11:02 صباحاً - كشف الفنان محمد صبحي موقف نادر جمعه بكوكب الشرق أم كلثوم، عندما كان شابًا يعمل بشباك تذاكر الحفلات، وهو الحلم الذي سعى لتحقيقه ليحظى بفرصة حضور حفلة لها، قائلاً:” وأنا في الثانوية كنت بشتغل بشباك التذاكر، وبأخد جنيه في اليوم، وكنت بقعد شهر كامل أحجز عشان أحضر حفلات أم كلثوم اللي كانت أول خميس من كل شهر، كنت بجمع 30 جنيه في الشهر، وكان المبلغ ده بيكفيني سنة.
وقال ببرنامج سبوت لايت، إنه تمكن أخيرًا من شراء تذكرة صف أول لحفل أم كلثوم مقابل 3 جنيهات، لكنه فوجئ بطلب غير متوقع من الإدارة، قائلاً: “جالي صاحب الجمعية اللي بشتغل فيها، وقالي مفيش كراسي فاضية صف أول؟ قلتله مفيش، قالي طيب الست محتاجة كرسي لضيف جاي من بره، فقلتله طيب هنعمل إيه؟ هنقوم الناس؟! فقالي طب ما أنت اشتريت تذكرة، هاتها فرفضت”.
وأشار إلى أنه أصر على حقه بحضور الحفل رغم الضغط عليه، حتى وصل الأمر إلى أم كلثوم نفسها، التي طلبت لقاءه:” دخلت عندها، وبمجرد ما شافتني قالت لصاحب الجمعية إيه ده ده عيل، فابتسمت، وقالتلي إنت شاري تذكرة عشان الحفل؟ طيب لو قلتلك أنا محتجاها عشان ضيف؟ فرديت عليها وقولتلها هقول لحضرتك إني مصري ومن حقي أحضر الحفلة”.
وروى اللحظة التي فاجأته فيها أم كلثوم بتصرفها الإنساني:” بصت لصاحب الجمعية وقالتله ده صعب، وقامت من مكانها، وخدتني من إيدي على كواليس المسرح، وحطتلي كرسي جنب الستارة، وقالتلي وأنا هغنيلك انت كنت هعيط من الفرحة، وبعد ما حضرت الحفلة ندهتلي واديتني ظرف، فتحت الظرف لاقيت فيه 50 جنيه، مع إن الناس كانت بتقول عليها بخيلة”.
