باسل النجار = الرياض في السبت 1 فبراير 2025 01:40 مساءً - فيه حاجة في الفنان حسن عابدين، تحسسك انه قريبك، هو شبه عمك، فيه من خالك.. ممثل شبنا بشكل غريب..

حسن عابدين ممثل عظيم.. وبعيدا عن عش المجانين المسرحية الأشهر ليه… او الديالوج الأشهر مع سهير البابلي “مين اللي سرق مصر”، في مسرحية “ع الرصيف”.. لكن هو ليه مسلسل حلو مش مشهور اسمه نهاية العالم ليست غدا.. المسلسل دا عظيم كفكرة في وقته.. وهكتبلكم بوست تفصيلي عنه..

حسن عابدين عمل اعلان شويبس في التمانينات وكان مكسر الدنيا حرفيا.. والناس ماشية في الشارع تقلد الاعلان اللي يوريك قيمة حسن عابدين.. ان حسن عابدين خد مليون جنيه اجر وقتها.. ودا كان اكبر اجر تقاضاه فنان من ساعة ما بدعوا السينما والفن.. رقم فلكي وقتها على إعلان.. اصلا المليون جنيه زمان كان رقم يهوس.. يهبل.. يعني فين اربعين فيلم اتعملوا فكرتهم عن يحصلك ايه لو بقى معاك مليون جنيه..

لكن حسن عابدين كان بيمر بازمة نفسية واكتئاب شديد.. ليه بقى.. هو كان بيعرض مسرحية عش المجانين والمسرحية مكسرة مصر.. وهو كان يحب يعمل عمرة علطوا.. فسافر عشان يؤدي العمرة وهو واقف قدام قبر الرسول صلى الله عليه وسلم.. شافه الحارس.. وقاله ابعد من هنا انت ممثل.. فمشي وهو بيبكي.. ولما رجع قرر الاعتزال وقال لمحمد نجم شوفلك واحد غيري.. وكان مبيعملش حاجة غير انه يروح يصلي ويرجع البيت بس..

حسن عابدين كان صديق شخصي للفنان العظيم إبراهيم الشامي رحمة الله عليهم.. ابراهيم الشامي نصحه يزور الشيخ الشعراوي .. والشيخ الشعراوي كان صديق شخصي لابراهيم الشامي.

المهم يا سيدي .. راح حسن عابدين للشيخ الشعراوي.. فلقي الشيخ فاتحله دراعاته.. وقاله اهلا اهلا بالحبيب.. استغرب حسن عابدين اللي بيشوف الشيخ الشعراوي لأول مرة.. فحسن عابدين سأله “انت تعرفني يا مولانا”، قاله اه عارفك وبشوف مسلسلاتك.. ايه دا هو ازاي التمثيل حرام والشعراوي بيتفرج عليا.. المهم يا سيدي.. حسن عابدين قال للشيخ انا عايز ابطل تمثيل.. انا مكتئب وعايز ابعد.. فالشيخ الشعراوي قاله: “لما انت والناس الكويسة تبطل .. هتسيبوا التلفزيون للناس الوحشة.. لازم تخليك وتقدن فن ليه رسالة”.

المهم اقتنع حسن عابدين وعمل كام عمل.. منهم برنامج اسمه نور الهدى.. مشاكل من المجتمع وتتمثل في قصة درامية وبعدين حسن عابدين يستضيف الشيخ الشعراوي.. ويعلق عليها برأي الدين والشرع فيها.. البرنامج حسن عابدين صور حلقاته بالكامل مع ليلى طاهر وعفاف شعيب وكان الفنانات بيطلعوا بالحجاب.. وحسن عابدين سلم الحلقات للتفلزيون.. والتلفزيون عرض اول 3 حلقات.. وبعد كدا وقف البرنامج تماما.. والبرنامج مظهرش تاني ولا اتعرض تاني ولا حتى ال 3 حلقات اللي اتعرضوا موجودين ع اليوتيوب.. واختفوا تماما.

وفكر الشيخ الشعراوي مع حسن عابدين وابراهيم الشامي يعملوا حاجة اسمها المسرح الاسلامي.. ورغم اني مش مقتنع بالفكرة بس الفكرة دي كانت هتلاقي رواج قوي مع جمهور كبير في مصر، لكن الفكرة فشلت ومحصلتش..

وأثناء عرض مسرحية بولوتيكا في اسكندرية .. حس حسن عابدين بتعب وارتفاع في درجة الحرارة فرجع القاهرة دخل المستشفي وعمل تحاليل وقال الدكتور ان حسن عابدين عنده لوكيميا وفضل بيها عشرين يوم في مصر، وبعدها سافر مع ابنه الكبير طارق لانجلترا وفضل هناك حوالي شهر وفي يوم الاثنين 6-11-1989… (نفس يوم وفاة ابويا سنة 2014)

وخدوه عشان يندفن في بني سويف، وصلى الشيخ الشعراوى إماما بالمصلين في الجنازة بتاعته فى قريته ببنى سويف اللي اندفن فيها.

ربنا يرحمه