باسل النجار = الرياض في الخميس 23 يناير 2025 03:56 مساءً - من المخرجين المبدعين برضه الاستاذ حسين كمال .. وكان زعل مني في يوم من الايام لما كان في روايه “ريا وسكينه” وكان مديني دور فيها
دور مين بقى ؟!
دور استاذ عبد المنعم مدبولي الله يرحمه .. بس انا كنت حاطط في دماغي ومقتنع جدا اني انا اعمل دور العسكري “دور احمد بدير” . طول الوقت شايف انا العسكري الراجل الاهطل الطيب ده اللي قاعد في القسم والحوادث والمصايب بتيجي عليه كلها وهو مش دريان ورايح يحب سكينه وعايز يتجوزها … انا راكبة في دماغي يجيبوني يمين شمال اقوللهم لا انا العسكري … لغايه ما جيت في الاخر قلتلهم خلاص انا مسافر وتعبان عشان امشي … فمشيت
فأستاذ حسين جاني البيت بعدها … شوفي بقى المخرج اما يكون بقى فنان حساس ورقيق .. جاني البيت الله يرحمه هو والفنانه العظيمه شاديه وانا كنت لسه يعني … قال لي يا حسن دور “حسب الله” جميل وبتاع .. قلت له معلش يا استاذ حسين ما تزعلش مني انا احساسي ان حاقدر ابقى مبدع هنا اكتر من هنا …اختيارك لي على راسي انا ما بقدرش اخالفه لان عارف انك انت مخرج واستاذ لكن انا دماغي ركبت هنا خلاص .. طبعا زعل مني فترة بس انا عرفت استرضيه واصالحه تاني.
